कोल्हापूरच्या राजकारणात सध्या गोकुळ दूध संघाच्या अध्यक्षपदाच्या निवडणुकीवरून सुरू असलेल्या वादात मोठी घडामोड घडली आहे. शिवसेने (उद्धव बाळासाहेब ठाकरे) पक्षप्रमुख उद्धव ठाकरे यांनी काँग्रेस नेते आणि माजी मंत्री सतेज पाटील यांना दूरध्वनीवरून संपर्क साधत पाठिंबा दर्शवला आहे. यामुळे महायुती सरकारवर टीका करणाऱ्या पाटील यांच्या भूमिकेला बळ मिळाले असून, कोल्हापूरच्या राजकारणात नव्या समीकरणांची चर्चा सुरू झाली आहे.

गोकुळ अध्यक्षपदाचा वाद चिघळला

गोकुळ दूध संघाच्या निवडणुकीनंतर अध्यक्षपदाच्या निवडीवरून संघर्ष तीव्र झाला आहे. या वादाचे मूळ चार शासननियुक्त तज्ज्ञ संचालकांना मतदानाचा अधिकार देण्याच्या निर्णयात आहे. या निर्णयामुळे सत्ताधारी महायुती सरकारवर विरोधकांनी जोरदार टीका केली आहे. हा निर्णय लोकशाही मूल्यांच्या विरोधात असून, गोकुळसारख्या मोठ्या संस्थेवर अप्रत्यक्षपणे नियंत्रण मिळवण्याचा प्रयत्न असल्याचा आरोप सतेज पाटील यांनी केला आहे.

सतेज पाटील यांच्या भूमिकेला उद्धव ठाकरेंचा पाठिंबा

मिळालेल्या प्राथमिक माहितीनुसार, उद्धव ठाकरे यांनी सतेज पाटील यांच्याशी दूरध्वनीवरून संवाद साधला. या संवादात त्यांनी पाटील यांनी घेतलेल्या भूमिकेचे समर्थन केले आणि त्यांना पूर्ण पाठिंबा देण्याचे आश्वासन दिले. राजकीय सूत्रांनी दिलेल्या माहितीनुसार, ठाकरे यांनी पाटील यांना धीर देत, 'गोकुळच्या हितासाठी घेतलेली भूमिका योग्य असून, आम्ही तुमच्या पाठीशी खंबीरपणे उभे आहोत,' असा संदेश दिला आहे.

तज्ज्ञ संचालकांच्या मताधिकारावर प्रश्नचिन्ह

महायुती सरकारने चार तज्ज्ञ संचालकांना मतदानाचा अधिकार दिल्याच्या निर्णयावर सतेज पाटील यांनी तीव्र आक्षेप घेतला आहे. या निर्णयामुळे निवडणुकीच्या प्रक्रियेत हस्तक्षेप झाल्याचा आरोप पाटील यांनी केला आहे. कोल्हापूरच्या राजकीय वर्तुळात या घटनेची सध्या जोरदार चर्चा सुरू असून, या पाठिंब्यामुळे गोकुळच्या अध्यक्षपदाच्या लढाईला नवे वळण मिळण्याची शक्यता वर्तवली जात आहे.

'गोकुळ दूध संघासारख्या स्वायत्त संस्थेमध्ये लोकशाही पद्धतीनेच निर्णय व्हायला हवेत. शासननियुक्त सदस्यांना मताधिकार देणे हे लोकशाही मूल्यांच्या विरोधात आहे,' असे मत राजकीय विश्लेषकांनी व्यक्त केले आहे.