पिंपरी-चिंचवड, १८ नोव्हेंबर २०२६: पिंपरी-चिंचवड पोलीस आयुक्तालयाच्या हद्दीत जानेवारी २०२१ ते २५ ऑक्टोबर २०२६ या कालावधीत तब्बल ६६३ बेवारस मृतदेह आढळल्याची संवेदनशील माहिती समोर आली आहे. नदी, नाले, कचराकुंड्या, विहिरी आणि निर्जन ठिकाणी आढळणाऱ्या या मृतदेहांची ओळख पटवणे पोलिसांसाठी मोठे आव्हान ठरत असून, अनेक जण मृत्यूनंतरही शासकीय दप्तरी 'अज्ञात' म्हणूनच नोंदवले जात आहेत.

वर्षनिहाय बेवारस मृतदेहांची आकडेवारी (२०२१ ते २०२६)

पोलीस नोंदीनुसार, गेल्या पावणेसहा वर्षांत सर्वाधिक १४७ बेवारस मृतदेह २०२५ मध्ये सापडले, तर २०२६ मध्ये २५ ऑक्टोबरपर्यंत १०१ मृतदेहांची नोंद झाली आहे:

वर्षआढळलेले बेवारस मृतदेह
२०२१११०
२०२२९५
२०२३१०७
२०२४१०३
२०२५१४७
२०२६ (२५ ऑक्टोबरपर्यंत)१०१
एकूण६६३

ओळख पटवूनही मृतदेह स्वीकारण्यास नातेवाईकांचा नकार

मृतदेहांमध्ये बेपत्ता नागरिक, ज्येष्ठ व्यक्ती, स्थलांतरित कामगार आणि मानसिक आजाराने त्रस्त व्यक्ती असण्याची शक्यता असते. मृतदेह कुजलेल्या किंवा विद्रूप अवस्थेत असल्यास ओळख पटवणे कठीण होते. धक्कादायक बाब म्हणजे, काही प्रकरणांत ओळख पटूनही कौटुंबिक वाद, सामाजिक दुरावा किंवा आर्थिक अडचणींमुळे नातेवाईक मृतदेह स्वीकारण्यास नकार देतात. अशा वेळी पोलीस प्रशासन आणि सामाजिक संस्थांना अंत्यसंस्काराची जबाबदारी पार पाडावी लागते.

पोलीस आणि सामाजिक संस्थांचे आवाहन

अज्ञात मृत्यू हा नेहमीच गुन्हा असेल असे नाही; शवविच्छेदन आणि घटनास्थळाच्या तपासणीतून हत्या, आत्महत्या, अपघात किंवा नैसर्गिक मृत्यूचे कारण शोधले जाते. ओळख पटवण्यासाठी छायाचित्रे, कपडे, डीएनए आणि बोटांचे ठसे जतन केले जातात. "अज्ञात मृतदेहांची ओळख पटवण्यासाठी वैज्ञानिक साधनांचा वापर केला जातो. कुटुंबातील व्यक्ती बेपत्ता झाल्यास नागरिकांनी विलंब न करता पोलिसांना माहिती द्यावी," असे आवाहन पिंपरी-चिंचवडचे अपर पोलीस आयुक्त बसवराज तेली यांनी केले आहे. तसेच, ओळख पटली नाही तरी प्रत्येकाला सन्मानपूर्वक अखेरचा निरोप मिळायला हवा, अशी भावना रिअल लाईफ रिअल पीपल संस्थेचे अध्यक्ष एम. ए. हुसेन यांनी व्यक्त केली.