पिंपरी-चिंचवड शहराच्या क्रीडा विश्वात महापालिका शाळेच्या विद्यार्थ्यांनी आपल्या क्रीडा कौशल्याच्या जोरावर ऐतिहासिक यश मिळवले आहे. नुकत्याच पार पडलेल्या जिल्हास्तरीय शालेय रग्बी स्पर्धेत पिंपरी-चिंचवड महानगरपालिकेच्या (PCMC) कै. दत्तोबा रामचंद्र काळे इंग्रजी माध्यम शाळा, थेरगाव या शाळेच्या संघाने सर्वोत्कृष्ट कामगिरी करत १४ वर्षांखालील आणि १७ वर्षांखालील अशा दोन्ही गटांत दुहेरी अजिंक्यपद आपल्या नावे केले.

स्पर्धेचे आयोजन आणि उद्घाटन

या प्रतिष्ठेच्या स्पर्धेचे आयोजन पिंपरी-चिंचवड महानगरपालिका क्रीडा विभाग, जिल्हा क्रीडा परिषद पुणे आणि एस.एन.बी.पी. इंटरनॅशनल स्कूल, चिखली यांच्या संयुक्त विद्यमाने करण्यात आले होते. स्पर्धेचे उद्घाटन क्रीडा विभागाचे प्रशासनाधिकारी दत्ता सूर्यवंशी यांच्या हस्ते उत्साहात संपन्न झाले. या स्पर्धेत जिल्ह्यातील नामांकित शाळांच्या संघांनी उत्स्फूर्त सहभाग नोंदवला होता.

हे सुद्धा वाचा: पिंपरी-चिंचवड पोलीस शिपायाचा मृत्यू; निगडीतील ट्रान्सपोर्ट नगरमध्ये मृतदेह आढळला
"महापालिका शाळेच्या विद्यार्थ्यांनी रग्बीसारख्या ताकदीच्या आणि तंत्रशुद्ध खेळात मिळवलेले हे दुहेरी यश कौतुकास्पद असून, यामुळे इतर विद्यार्थ्यांनाही क्रीडा क्षेत्रात पुढे जाण्याची प्रेरणा मिळेल," अशा शब्दांत क्रीडा अधिकाऱ्यांनी संघाचे अभिनंदन केले.

मैदानावर चुरशीच्या लढती आणि दुहेरी मुकुट

१४ वर्षांखालील मुलांच्या अंतिम सामन्यात दत्तोबा काळे शाळेच्या संघाने आक्रमक चढाया आणि भक्कम बचावाच्या जोरावर पिंपरीतील श्रीमती अनुसयाबाई वाघिरे इंग्लिश मीडियम स्कूलचा पराभव करून सुवर्ण पदक पटकावले. या गटात ज्ञानदीप विद्यालय, रुपीनगर संघाने तृतीय स्थान मिळवले.

त्यानंतर पार पडलेल्या १७ वर्षांखालील मुलांच्या अंतिम लढतीतही दत्तोबा काळे शाळेच्या खेळाडूंनी वर्चस्व कायम राखत ज्ञानदीप विद्यालय, रुपीनगर संघावर मात केली आणि विजेतेपदावर शिक्कामोर्तब केले. या गटात यमुनानगर येथील शिवभूमी इंग्लिश मीडियम स्कूलने तृतीय क्रमांक मिळवला.

प्रशिक्षक व क्रीडा शिक्षकांचे अभिनंदन

दोन्ही वयोगटांत अव्वल स्थान मिळवून शाळेचा नावलौकिक वाढवणाऱ्या खेळाडूंचे, त्यांचे मार्गदर्शक प्रशिक्षक, क्रीडा शिक्षक आणि संयोजन समितीचे सर्व स्तरांतून कौतुक करण्यात येत आहे. या यशाने पिंपरी-चिंचवडच्या क्रीडा क्षेत्रात महापालिका शाळांनी आपली गुणवत्ता पुन्हा एकदा सिद्ध केली आहे.