पुण्यातील विश्रांतवाडी परिसरामध्ये एका १२ वर्षीय अल्पवयीन बालिकेवर लैंगिक अत्याचार झाल्याची संतापजनक घटना उघडकीस आली आहे. या प्रकरणी तत्पर कारवाई करत विश्रांतवाडी पोलिसांनी कामगारनगर येथील रहिवासी असलेल्या ५२ वर्षीय जयसिंग भानुदास साठे याला अटक केली आहे. आरोपी हा पुणे महानगरपालिकेत कंत्राटी स्वच्छता कर्मचारी म्हणून कार्यरत असल्याची माहिती पोलिसांनी दिली आहे. पीडित मुलगी आणि आरोपी हे शेजारी राहत असल्याचे प्राथमिक तपासात स्पष्ट झाले आहे.

वैद्यकीय तपासणीनंतर गुन्हा दाखल, पॉक्सोची कडक कलमे लागू

पोलिसांनी दिलेल्या माहितीनुसार, ही घटना १२ सप्टेंबर २०२६ रोजी घडल्याचा आरोप आहे. त्यानंतर २२ सप्टेंबर रोजी पीडित मुलीला वैद्यकीय तपासणीसाठी रुग्णालयात दाखल करण्यात आले. रुग्णालयातील वैद्यकीय अधिकाऱ्यांनी घटनेची माहिती दिल्यानंतर पोलिसांनी पीडितेच्या आईचा जबाब नोंदवून तात्काळ गुन्हा दाखल केला.

सुरुवातीला या प्रकरणात भारतीय न्याय संहितेच्या (BNS) कलम ७४ व ३५१(२) आणि पॉक्सो (POCSO) कायद्याच्या कलम ८ अंतर्गत गुन्हा नोंदवला होता. मात्र, पीडितेचे व तिच्या पालकांचे पूरक जबाब आणि वैद्यकीय तपासणी अहवाल प्राप्त झाल्यानंतर पोलिसांनी या प्रकरणात BNS कलम ६५(२) तसेच पॉक्सो कायद्याची कलमे ४, ६ आणि १२ ही अत्यंत कठोर कलमे वाढवली आहेत.

"या प्रकरणातील आरोपीला तात्काळ अटक करण्यात आली असून पुरावे आणि वैद्यकीय तपासणीच्या आधारे अतिरिक्त कठोर कलमे लावण्यात आली आहेत. प्रकरणाचा निष्पक्ष व सखोल तपास सुरू आहे," असे विश्रांतवाडी पोलीस प्रशासनाकडून सांगण्यात आले.

हे सुद्धा वाचा: पिंपरी-चिंचवड पोलीस शिपायाचा मृत्यू; निगडीतील ट्रान्सपोर्ट नगरमध्ये मृतदेह आढळला

पोलीस ठाण्यावर नागरिकांचा मोर्चा वाहतूक दोन तास ठप्प

घटनेचे गांभीर्य लक्षात येताच रविवार, २७ सप्टेंबर रोजी स्थानिक नागरिकांचा संताप अनावर झाला. शेकडो महिला आणि परिसरातील नागरिकांनी थेट विश्रांतवाडी पोलीस ठाण्याबाहेर एकत्र येत जोरदार निदर्शने केली. सुमारे ५०० जणांच्या या आंदोलनामुळे आणि रास्ता रोकोमुळे पुणे-आळंदी रस्ता, जेल रोड आणि विमानतळ रस्त्यावरील वाहतूक सुमारे दोन तास पूर्णपणे विस्कळीत झाली होती. पोलिसांनी आंदोलनकर्त्यांशी चर्चा करून परिस्थिती नियंत्रणात आणल्यानंतर रात्री उशिरा वाहतूक सुरळीत झाली.

या आंदोलनात शिवसेना (उद्धव बाळासाहेब ठाकरे) पक्षाच्या नेत्या सुषमा अंधारे यांनी प्रत्यक्ष उपस्थित राहून पीडित कुटुंबाची भेट घेतली. या खटल्याची सुनावणी जलदगती न्यायालयात (फास्ट-ट्रॅक कोर्ट) चालवण्यात यावी, या प्रकरणासाठी विशेष तपास पथक (SIT) स्थापन करण्यात यावे आणि संशयित साथीदारांची चौकशी व्हावी, अशी मागणी त्यांनी केली आहे. पोलीस या प्रकरणी सर्व तांत्रिक आणि न्यायवैद्यक पुराव्यांच्या आधारे पुढील तपास करत आहेत.