पिंपरी-चिंचवड | प्रतिनिधी

पिंपरी-चिंचवड महापालिकेच्या यशवंतराव चव्हाण स्मृती (YCM) रुग्णालयातील रुबी केअर विभागात सुट्ट्या पैशांच्या कारणावरून नागरिक आणि एका कर्मचाऱ्यामध्ये वाद झाल्याचा आरोप समोर आला आहे. यावेळी संबंधित कर्मचाऱ्याने नागरिकांशी उर्मट भाषेत बोलत, 'व्हिडिओ काढ... काय करायचं ते कर' असे म्हणत धमकी दिल्याचा दावा उपस्थित नागरिकांनी केला आहे.

२०० रुपयांच्या नोटेवरून वाद

प्रत्यक्षदर्शींनी दिलेल्या माहितीनुसार, एका ज्येष्ठ नागरिकांकडे २० रुपयांचे शुल्क भरण्यासाठी २०० रुपयांची नोट होती. मात्र, सुट्टे पैसे नसल्याचे सांगत ती नोट स्वीकारण्यास नकार देण्यात आल्याचा आरोप आहे. त्यानंतर उपस्थित दुसऱ्या नागरिकाने समायोजन करण्याची विनंती केली, मात्र तीही नाकारण्यात आल्याचे सांगितले जाते.

उर्मट वर्तनाचा आरोप

या घटनेनंतर वाद वाढल्याचे सांगितले जात आहे. संबंधित कर्मचाऱ्याने नागरिकांशी अरेरावीची भाषा वापरल्याचा, ओळखपत्र खिशात लपवून ठेवल्याचा तसेच गैरवर्तन केल्याचा आरोप नागरिकांनी केला आहे. या प्रकारामुळे रुग्ण आणि त्यांच्या नातेवाईकांमध्ये नाराजी व्यक्त करण्यात आली.

चौकशीची मागणी

या प्रकरणाची निष्पक्ष चौकशी करून संबंधित कर्मचाऱ्यावर योग्य ती कारवाई करण्यात यावी, अशी मागणी नागरिकांनी केली आहे.

स्पष्टीकरण : या वृत्तातील सर्व आरोप नागरिकांनी केलेले आहेत. संबंधित कर्मचारी किंवा YCM रुग्णालय प्रशासनाची अधिकृत भूमिका अद्याप समोर आलेली नाही. ती प्राप्त झाल्यानंतर तीही प्रसिद्ध करण्यात येईल.